Miss Teen Aruba 2025 Tara van der Werk

Blog Interview: Miss Teen Aruba 2025 Tara van der Werk

Mi nomber ta Tara van der Werk. Miss Teen Mirrors Beauty Academy by Edgar Kock y mi ta candidata number 3 pa cu e eleccion di Miss Teen Aruba International 2025.
Mi a nace riba un diabierna 1 Februari, 2008 y esaki ta haci cu mi ta pertenece na e signo di Acuarius. Mi ta un persona hopi independiente yena cu originalidad y cu hopi pasion pa humanidad pero semper buscando innovacion y cu e capacidad pa por resolve problemanan.

Mi a caba di slaag pa mi H.A.V.O. diploma na Colegio Arubano y sigientemente mi lo studia derecho, specificamente “Strafrechten” na Leiden, Hulanda.

Mi a crece den un hogar domina pa hende muhenan fuerte y decidido, caminda balor di independencia y superacion ta parti di nos dia a dia.
Mi wela, un hende muhe luchado a enfrenta diferente desafio den su bida y e a siñami pa nunca rindi. Mi mama, un hende muhe increibel ta mi mayor inspiracion y forsa. Mi tata semper ta den mi bida brindando mi su apoyo y guia den cada paso cu mi tuma. Mi gusta comparti tempo cune mirando Fomula 1 y asina analisa strategianan.

Mi famia ta hopi conoci den e mundo di beyesa y mi mama Judelca Briceño tabata Reina Infantil di Aruba su Carnaval na aña 1989. Tambe mi mama tabata Miss Mundo Aruba na aña 1998 y el’a representa Aruba na e mesun aña aki na Seychelles caminda el’a posiciona su mes na di 11 lugar.

Sigiendo pasonan di mi mama mi a participa y gana e corona den e eleccion di Reina Infantil di scol preparatorio Kudawecha na aña 2019 y cu e bendicion di henter mi famia mi a inscribi mi mes e aña aki den e certamen di Miss Teen Aruba International y mi por bisa cu esaki tabata un bon decision.
E ta un certamen cu ta exihi hopi disciplina y dedicacion. Pero e ta un certamen tambe caminda como hoben mi a siña hopi cos manera: Con pa ta un lider, con pa traha riba mi auto-confiansa y pa mi compronde e rol di nos hende muhenan den e mundo moderno di awendia

Den mi tempo liber mi ta gusta baila. Mi a forma parti pa 10 aña largo di un scol di ballet. Aki mi a siña entre otro ballet clasico, jazz, modern dance, tap dance y mucho mas.
Durante pandemia mi a descubri un otro pasion dimi cual ta ‘kite-surfing’ cual mi ta practicando pa 5 aña caba.

Mi plan pa futuro ta pa mi termina mi estudio di ley na Hulanda y pa mi traha di cerca cu diferente fundacionnan cu ta para pa derecho y proteccion di nos animalnan.
Tambe mi kier tuma e sigiente añanan pa prepara mi mes fisicamente y mentalmente pa asina eventualmente aki un paar di aña mi participa den e certamen di Miss Universe Aruba y asina tin e oportunidad pa representa mi isla dignamente riba nivel internacional y promove mi isla riba tur plataforma digital.

Tur loke mi a siña durante e seminarionan di Miss Teen Aruba International 2025 a inspirami pa skirbi un buki titula: “Descubri bo poder”. Cu e buki aki mi kier inspira, motiva y educa otro hoben y ser humano pa descubri nan poder riba e caminda di empoderamento conhuntamente cu resiliencia, determinacion, auto-confiansa, amor propio y liderazgo.

Mi kier a manda un palabra di motivacion pa nos hubentud pa nan semper ta nan mes y pa nan kere den nan mes. Pa nan stima nan mes y balora nan mes. Pa nan no perde nan autenticidad den un mundo virtual caminda ‘peer pressure’ ta domina. Forma bo propio opinion y para pa loke bo ta kere aden. Para semper pa e berdad maske bo tin cu para bo so y nunca para na banda y wak.

Xoxo,
Tara van der Werk.