Miss Teen Aruba 2025 Abigail Sánchez

Blog Interview: Miss Teen Aruba 2025 Abigail Sánchez

Mi nomber ta Abigail Sánchez, mi tin 19 aña di edad y mi ta considera mi mes como un persona perseverante y sensible, mirando e sensibilidad como un poder pa por empatisa cu otro. Aworaki, mi ta studiante di Trabou Social na Universidad di Aruba, despues di a gradua di Colegio Arubano HAVO y tuma un aña di descanso pa traha y logra algun meta personal. Den mi tempo liber, mi ta journaling, baila, canta y crea contenido. Mi ta stima e deportenan acuatico. Mi a practica landramento artistico conoci como artistic swimming internationalmente pa 5 aña awor mi ta practicando surf como hobby, un soño cu mi tabata tin for di chikito y mi ta realisando. Pa mi conta un tiki di mi famia nan ta inmigrante for di Venezuela, y aunke mi a nase na Aruba, mi ta sinti mi mes hopi orguyoso di e dos culturanan. Mi famia ta hopi grandi cu esaki mi tata, mi mama, ruman muher chikito, hopi primonan, welanan, tanchinan y omonan. Mi plan pa futuro ta finalisa mi studio den trabou social, sigui cu un maestria den psicologia clinico pa asina mi por guia hobenan y personanan yega nan bienestar emocional, fisico y mental mescos ami un dia a wordo guia. Explora mas e mundo di modelahe na nivel internacional tambe lo ta algo cu mi kier hasi, desde chikito mi ta encanta modela. Tambe mi a participa na mi prome certamen di beyesa Miss Youth Aruba 2021. Esaki a habri hopi porta pa mi por modela pa diferente tienda of marca. Awo mi a dicidi di participa na Miss Teen Aruba International pa por husa e plataforma aki pa ta un bos pa esnan cu no ta durf di papia. Mi experiencia cu Miss Teen Aruba International mi ta encante, mi a sera conoci cu hopi hende bunita y mas importante mi a wak un crecimiento personal den mi. Mi conseho pa nos hubentud ta pa nunca lubida di bo mes y di bo sonjonan. Maske bida por ta dificil no rindi nunca, pasobra e mas grandi satisfaccion ta logra bo metanan cu bo mesun esfuerso.