Claudia Caralps Faro ta presenta Beyond Aruba https://www.beyondaruba.com/

E idea pa Beyond Aruba https://www.beyondaruba.com/ a bini di mi mesun experiencia ora mi a dicidi di studia na Merca. For di trempan, mi a realisa cu no tabata tin informacion tampoco guia, specificamente pa studiantenan di Aruba, y e proceso a sinti overwhelming. Tabata tin asina hopi informacion pa cu e proceso y no tabatin un solo lugar pa acudi na dje pa haña contesta.

Despues di a papia cu otro studiantenan Arubiano na Merca, a sali na cla cu hopi di nos a enfrenta e mesun retonan, nos tur a desea cu tabata tin un caminda cu nos por a bay pa informacion confiabel y conseho practico. Ta e ora ey e idea a cuminsa forma; dicon no crea algo cu por yena e bashi ey?

Cu e sosten di mi famia, mi a dicidi di tuma e iniciativa y construi Beyond Aruba. Mi meta ta pa hacie mas facil pa futuro studiantenan haya e guia y e informacion cu mi ta desea di tin ora mi a cuminsa mi propio trayecto.

Informacion di Claudiia: Mi nomber ta Claudia Caralps Faro, un orguyoso studiante Arubiano actualmente studiando Business cu un enfoke riba finanzas na Valencia College na Florida. Semper mi tabata un hende cu ta gusta siña cos nobo, explora diferente cultura, y haña maneranan pa crece tanto personal como academicamente. Mi ta gusta lesa buki y keda curioso door di semper siña algo nobo. Desde cu mi a muda pa Merca, mi a realisa con hopi mi ta disfruta di yuda otro nan, specialmente studiante nan di Aruba cu ta pensando riba studia den exterior. Aunque mi ta leu for di cas, mi a descrubi cu ainda mi por haci un impacto positivo na Aruba door di comparti mi mesun experiencia y conocemento. Mi meta pa futuro ta pa gradua cu mi Associates Degree na December 2025, despues transferi pa un Universidad di cuater aña pa completa mi studio di Bachelors den Finanzas. Despues di a haña experiencia di trabou na Merca, mi tin plania pa regresa Aruba y contribui na e compania di construction y desaroyo di mi famia. Durante mi tempo na Merca, mi ta desea di sigi sostene studiantenan di Aruba door di crea mas recurso y oportunidad pa yuda nan logra nan meta nan.