Yuda bo yiu regula su emocionnan!

Yuda bo yiu regula su emocionnan!

Emocion grandi den un curpa chikito por ta dificil pa compronde y mas dificil ainda pa controla!
Regulacion di emocionnan ta algo hopi importante pa e desaroyo di e mucha, muchannan no ta nace cu e
abilidad aki, esaki ta wordo siña poco poco cu guia di nan mayornan y hendenan rond di e mucha.
Siñando con pa regula bo emocionnan nota un proceso facil. Segun Pamela Cole, un psicologo na Penn
State University, esaki ta rekeri atencion, planificacion, desaroyo di idioma y desaroyo cognitivo.
Regulacion propio ta e abilidad di regula bo emocionnan y comportacion den situacionnan na unda cu bo
tin emocion nan grandi cu por stimula un reaccion y sintimento negativo, regulando esakinan kiermen cu
bo lo por calma bo mes ora cu bo rabia, bo por ahusta bo mes ora tin cambionan den bo expectativanan y
alabes con pa maneha bo frustracion sin haya un explosion emocional.
Awo bo por ta puntra, con nos por yuda nos yiunan regula nan emocion nan?
Abo como mayor tin e trabou importante di pone un palabra na e emocion cu bo yiu ta sintiendo. Den e
prome aña di bida di e mucha e unico manera cu nan sa con pa mustra emocion ta door di yora. Ora e
mucha bira mas grandi ta importante pa e cuminsa compronde locual e ta sinti. Por ehempel; si bo
yiu(nan) ta rabia pasobra e no por haya ijscream, bo ta bise “mi ta compronde cu bo ta rabia pasobra bo
no por haya ijscream pero bo no a come bo cuminda ainda.” Door di haci esaki e mucha lo compronde cu
e emocion cu e ta sintiendo ta rabia. Bisando cu bo ta compronde den un tono suave, bo ta laga bo
yiu(nan) sa cu su sentimientonan ta valido y cu ta okay pa sinti asina.
Pero, siña haci esaki cu bo emocionnan propio tambe! Papiando di bo sentimento nan como mayor por ta
dificil, pero e ta completamente okay pa bo yiu(nan) sa cu abo tambe tin emocionnan. En realidad,
papiando di bo emocionnan cu bo yiu(nan) sin pone nan sinti responsabel pa esaki ta un di e mihor
manera nan pa siña bo yiu(nan) empatia, pa modela comportacion emocional y pa yuda bo yiu(nan) pone
limitacion entre nan mes y otro hende.
Pa abo como mayor por siña bo yiu e abilidad di regula su emocionnan, abo mes como mayor mester
practica e abilidad aki tambe. Por ehempel, e siguiente biaha cu bo ta sintibo frustra of rabia, specialmente
den presencia di bo yiu(nan)- practica regulando bo emocionnan door di para keto unrato, hala rosea
grandi y bisa palabranan cariñoso na bo mes, por ehempel “esaki ta sinti dificil, paso e ta dificil, no paso
ami ta haciendo e fout.”
Pa finalisa, maske ta bon pa bo yiu(nan) sa con pa regula nan emocionnan, ta normal ora nan tin dificultad
pa haci esaki. Esaki ta realidad y un bon seña di un mucha su desaroyo. Ta importante pa reconoce cu pa
abo yuda bo yiu bo mester cuminsa na bo mes. Y corda tambe cu bo no ta bo so den esaki. Ta un mayor ta
e trabou di mas duro riba e mundo aki, pero e ta bira un tiki mas facil ora cu un yuda otro. Manera hopi
hende sa bisa: “it takes a village.”