Aruba A Mustra Su Presencia! Fundacion ABO Ta Celebra e Exito di Make Aruba Pink 2026

Aruba A Mustra Su Presencia! Fundacion ABO Ta Celebra e Exito di Make Aruba Pink 2026
Luna di october a finalisa, pero e mensahe ta sigui: “Mi ta sinti mi bon. Mi ta sigui
haci mi mamogram.”
Oranjestad, Aruba | November 2026
Aruba a mustra su presencia, y hunto nos a transforma den un isla ros! Durante henter
luna di october, edificionan a ilumina den color ros, cintanan a wordo traha cu hopi
cariño, y empresanan, scolnan, institucionnan gubernamental y comunidad completo a
uni nan forsa pa apoya e conscientisacion tocante cancer na pecho.
Awor cu Make Aruba Pink 2026 a yega na su fin, Fundacion ABO ta celebra cu orguyo
un luna extraordinario di solidaridad, participacion comunitario y combersacionnan
significativo tocante screening pa cancer na pecho.
E cifranan ta conta e historia:
 150 mil + persona a wordo alcansa pa medio di comunicacion y actividadnan di e
campaña.
 100 + organisacion y partner a uni nan na e movimiento.
 10 mil + cinta ros a wordo traha y comparti na Aruba.
 45 + edificio a wordo ilumina den color ros.
 50 + actividadnan comunitario, incluyendo aparicionnan di e Queen's Throne,
actividadnan na lugarnan di trabou y sesionnan educativo.
 1000 + cita a wordo traha durante luna di october door di e programa di
screening BOB di Fundacion ABO cu a resulta den 712 mamogram.
Tras di cada cifra tin un comunidad cu a uni pa un causa cu ta importante.

Mas cu Solamente un Aruba Ros
E campaña di e aña aki tabatin un solo mensahe, simpel pero poderoso: “Mi ta sinti mi
bon y toch Mi ta sigui haci mi mamogram.”
Door di e programa di screening pa cancer na pecho, BOB, Fundacion ABO ta anima
tur hende muhe cu ta cay bou di e grupo di edad eligibel, di 45 te 75 aña, pa participa
regularmente den screening di mamografia, hasta ora nan ta sinti nan mes
completamente saludabel.
For di e Queen's Throne cu a biaha door di henter nos isla te na actividadnan pa traha
cinta ros, iluminacionnan den color ros, videonan educativo y combersacionnan na
lugarnan di trabou, tur iniciativa tabata tin e mesun proposito: bay mas leu cu solamente
crea conscientisacion y inspira hende muhe pa tuma accion.
“Make Aruba Pink nunca tabata solamente pa transforma nos isla na ros. E tabata pa
recorda hende muhe pa tuma accion pa nan salud. Ta conmovedor pa mira con tanto
hende, empresa, scolnan y organisacionnan a uni pa comparti e mensahe aki. Cada
cinta ros, cada luz ros y cada combersacion a yuda nos yega mas cerca di un persona.
Nos ta profundamente agradeci y orguyoso di locual Aruba a logra hunto.” Jennifer de
Robles Marketing Manager, Fundacion ABO
October A Caba. Screening No Ta Caba.
Aunke Luna di Conscientisacion pa Cancer na Pecho a termina, e trabou di Fundacion
ABO ta sigui durante henter aña. E fundacion ta anima tur hende muhe cu ta cay bou di
e grupo di edad eligibel pa haci nan cita pa un mamogram, y ta invita empresanan,
scolnan y organisacionnan pa programa charlanan educativo durante henter aña.
Preparacion pa Make Aruba Pink 2027 ta cuminsa caba, y organisacionnan interesa pa
participa ta cordialmente invita pa forma parti di e iniciativa aki.
Fundacion ABO ta expresa su gratitud di curason na tur partner, boluntario, empleado y
miembro di comunidad cu a contribui pa haci e campaña aki posibel.
Aruba, boso no a transforma solamente nos isla ros. Boso a recorda nos di locual
nos por logra ora nos para hunto.