Rotaract Club of Aruba a clausura 2025 dunando bek na nos comunidad

Rotaract Club of Aruba a clausura 2025 dunando bek na nos comunidad
Rotaract Club of Aruba tin e honor pa duna bek na nos comunidad pa mas cu 34 aña cu
e meta pa fortalece y apoya esnan menos afortuna. Ademas, Rotaract ta cumpli cu
proyectonan den cuadro di educacion, bienestar publico y cu enfoke riba mucha,
conhuntamente cu companianan local di Aruba. E aña aki no tabata un excepcion, e
team dinamico di Rotaract Club of Aruba a clausura 2025 activamente dunando bek na
comunidad di Aruba cu e proyecto di “December Giving”.
Den e ultimo luna di 2025, Rotaract a comparti nan tempo, a haci donacion y esfuerzo
pa asina contribui na un temporada di fin di aña feliz pa diferente grupo den nos
comunidad. Diahuebs 11 di december, e grupo a parti Candy Canes hunto cu un bunita
mensahe pa asina comparti bon deseonan den e temporada di fiesta riba e famoso
brug di Renaissance.
Riba 19 di december, Rotaract a regala 25 cadeaubon di e supermercado “Save More”,
hunto cu un Pan de Jamon, cu tabata den cortesia di Panaderia del Pueblo, na
famianan di menos recurso pa nan tambe por pasa nan dianan di fiesta feliz y cu
comestibel den cas. Rotaract ta para tras di proyectonan cu tin un impacto positivo y
asina sirbi nos comunidad.
Rotaract ta gradici SaveMore, Panaderia Del Pueblo y PostAruba pa nan cooperacion
durante e temporada druk aki di Pasco.
Finalmente, den nomber di Rotaract Club of Aruba, nos ta desea e pueblo di Aruba un
bon pasco y feliz aña nobo.