Direccion di Deporte cu tayer pa entrega di plan di entrenamento 2027

Direccion di Deporte cu tayer pa entrega di plan di entrenamento 2027
E Direccion di Deporte (DdD) cu ta e departamento tecnico na Comite Olimpico Arubano (COA) a yama un reunion cu tur federacion miembro pa asina inicia e proceso tecnico deportivo pa aña 2027. Durante e tayer aki a duna un splicacion amplio di e proceso cu e federacionnan y entrenadornan lo mester cana pa asina entrega un plan di entrenamento pa atletanan cu ta desea di ta parti di COA su delegacionnan pa e Weganan di 2027, ademas di e atletanan prospecto pa e futuro. Pa aña 2027 lo conta cu 2 Weganana, Iquique 2027 cu ta e “Weganan Suramericano di Mar y Playa” na luna di maart y tin e Weganan Panamericano Lima 2027 cu lo inicia na luna di juli. E atletanan proponi pa e futuro ta atletanan cu ta den trayecto pa desaroya pa participa na e eventonan Hubenil y Junior pa e siguiente Ciclo Olimpico 2029-2032.
Durante e sesion di ayera nochi a splica e proceso di con pa haci entrega di e plan di entrenamento. Monica Fajardo cu ta e Directora Tecnico a presenta e documentonan cu a prepara pa cada entrenador hunto cu nan comision tecnico y federacion por yena pa asina duna COA tur e informacion rekeri di cada atleta dentro di nan seleccion. A base di e informacion e ekipo di DdD lo bay evalua e grupo di atleta. Banda di esaki a presenta un documento importante pa e directiva di e diferente federacionnan unda nan lo mester yena informacion necesario, pa asina por tin un bon structura pa alinea e diferente proceso y comunicacion den cuadro di e aspectonan tecnico deportivo. Finalmente a hiba un dialogo ameno cu tur presente, contestando diferente pregunta haci y a duna informacion adicional.
COA y DdD ta gradici tur federacion miembro y entrenador cu a participa na e tayer aki, mustrando nan interes di forma parti di e proceso tecnico y asina sigui eleva e nivel di deporte na Aruba.

#COA #TEAMARU #Lima2027 #Iquique2027 #Olympics