Roberto Avalo Academy Un Summer School di exito extraordinario

Roberto Avalo Academy Un Summer School di exito extraordinario

Oranjestad, Aruba – Roberto Avalo Academy a marca un momento historico cu e lansamento di su promé Summer School, cu a reuni 46 participante entre 8 te 21 aña den un siman di entrenamento intenso, inspirador y transformador.
Durante e siman, e hóbennan a ricibi lesnan profesional den pasarela, baile, arte, fotografia, public speaking, self-discovery y desaroyo personal. No obstate, e academia a bay mucho mas aleu cu solamente forma modelonan. Su meta principal tabata pa forma personanan cu tin insiguridat y transforma nan mes cu un actitud positivo y e balor pa sigui nan soñonan.
“Beyeza ta pasa, pero actitud ta keda pa semper. Un corona no ta haci un reina; karakter, respeto, disciplina y amor pa bo mes ta haci esey,” Roberto Avalo a expresa.
Cada seshon tabata enfoca riba empoderamento personal, reconociendo e balor úniko di cada participante. Nan a sinja con pa supera miedo, lanta for di inseguridad y descubri e poder cu ya tabata biba den nan mes.
Roberto Avalo, considera como un verdadero catedrático den e mundo di moda, imagen y beyeza, a declara cu e Summer School ta solamente e principio di un proyecto cu lo cambia bida.
“Nos academia ta habri su portanan pa tur hende. No solamente pa esnan cu kier participa den reinadonan, pero tambe pa cualkier persona cu kier desaroya su personalidad, liderazgo, confianza y sinja con pa converti soñonan den realidad cu e actitud correcto.”
Roberto Avalo Academy ta converti su mes den e promé Fashion Academy di Aruba cu ta ofrece un programa tan completo. Cu e prestigio internacional di Roberto Avalo y su experiencia den e mundo di moda y reinadonan, e academia tin e ambicion di atrae modelonan y candidatanan internacional pa bin Aruba haci entrenamento y preparacion.
E team hoben y dinamico ta consisti di Gillary Carvillo, Xante Pina y Guizza Maria Steenvoorde, kende huntu cu Roberto ta comparti nan conocimiento y experiencia internacional.
Un di e metanan principal di e academia ta tambe pa crea un puente di colaboracion entre e diferente organizacionnan di beyeza di Aruba. E vision ta pa traha huntu, comparti conocemento y prepara candidatanan cu por representa Aruba na e nivel internacional cu excelencia, profesionalismo y union.
Y esaki ta solamente e cuminsamento.
Esaki no ta tur loke nos lo tende di Roberto y su Academy e anja aki ya cu na September lo e lidera un di e eventonan di moda mas grandi di Aruba: Art Fashion 2026, bou di e tema inspirador “Nature Meets Mankind.” Ya tin un elenco impresionante di diseñadónan local y internacional confirma pa transforma e caynan di Aruba den un verdadero escenario di moda, arte y creatividad.