Fundacion CVA a organisa “Stroke Conference”

Diasabra durante dia Fundacion CVA a organisa “Stroke Conference” atake cerebral y celebracion di nan 20 aniversarion na Teresita Center.

Kiko ta un atake cerebral? Un atake cerebral ta un sangramento den e celebro of un infarto [blokeo di ader] den e celebro.

Consecuencia: E consecuencianan por ta fisico of mental, manera bira parcialmente of completamente invalido, haya dificultad cu papiamento, haya problema cu bista y of cambio di caracter. Hopi di e consecuencianan aki por wordo trata of mehora pa medio di terapia.

Con lo por reconoce un atake cerebral? Den caso di posibel atake celebral, uza e sistema di FAST cu ta un denominacion den ingles cu ta yudabo corda e senalnan di un atake celebral:

Face, cara. Check si e cara di e persona ta colga of trek pa un banda mientras e ta purba di papia of hari cu bo.

Arms, brasa. Check si un brasa ta colga mas abou ora e persona ta purba hisa ambos brasa.

Speech, papia. Check si e persona por ripiti un frase simpel. E papiamento no ta cla of e ta strano?

Time, tempo. Durante un atake celebral cada minuut ta conta. Si e bo observa cualkier di e senalnan aki, bo mester actua mesora y 911 di biaha.

Con bo por preveni un atake celebral? E factornan di riesgo ta; presion di sanger halto, colestrol halto, humanento, diabetes, trastorno di e ritmo di curason, sobrepeso, edad halto of si e yega di haya un atake celebral.

Hiba un bida activo, come saludabel y haci controlnan regular [presion di sanger, colesterol y sucu] ta yuda baha e riesgo di haya un atake celebral.

Apoya Fundacion CVA cu un contribucion na CMB 24415000 pa asina continua cu nan tarea di conscientisacion y informacion na e comunidad.