Pashentnan di Aruba ta lansa como prome organisacion nacional pa pashent

Pashentnan di Aruba ta lansa como prome
organisacion nacional pa pashent
Riba 17 di september, dia mundial di siguridad di pashent, a lansa oficialmente
Pashentnan di Aruba (PDA) na Universidad di Aruba. PDA ta e prome
organisacion nacional na Aruba dedica na duna tur pashent su debido
representacion na mesa di salud y gobierno.
Pa prome biaha, pashentnan na Aruba tin un plataforma nacional
independiente unda nan por comparti nan experiencia, expresa
preocupacionnan y contribui na su mesun salud.
Esaki ta mas cu bon bini, pasobra siguridad di pashent ta parce un
principio simpel, pero e realidad cu hopi ta biba ta esaki: e cuido cu mester
yuda un persona, no mester caus’e daño. Y pa mehora e siguridad aki, un
sistema di salud mester ta dispuesto tambe pa scucha e pashent ora cos
bay robes.
PDA kier contribui na un cultura unda experiencia di pashent no ta keda
solamente como un caso individual. Tur caso ta conta y ora e mesun tipo di
experiencia ta bolbe ripiti, e ta bira un señal cu no por wordo ignora mas.
Awo en adelante riba pashent.org, pashentnan por comparti tur loke nan a
biba den carni propio den forma sigur y anonimo (opcional). E relatonan
por yuda identifica patronchi, temanan recurente y reto cu pashentnan ta
encontra den cuido di salud y te cu awe ta keda silencia pa miedo di papia.
PDA ta enfatisa cu su meta no ta pa busca culpabel ni pa pone pashent y
profesional di salud contra otro. E meta ta pa nos cambia e tipo di
combersacion na unda ta husga y comanda e pashent, na uno cu ta
compronde, sostene y guia e pashent den e sistema di salud.

E trabou di PDA ta basa riba cuater compromiso: Scucha, Compronde,
Conecta y Actua.
Esaki ta haci cu PDA lo scucha e casonan di bida real y traduci esaki na
patronchinan cu gobierno y sector di salud ta compronde. A lo largo esaki
ta hiba na crea un espacio real pa mehoracion.
P’esey tambe PDA ta sumamente contento di e gran acogida durante e
lansamento. Diferente parti di comunidad di salud a bin hunto: pashentnan,
profesionalnan, organisacionnan y representante di gobierno y parlamento.
Nos tur tin un interes comun: un sistema cu ta mas sigur, pagabel,
accesibel y humano.
Awor e trabou ta cuminsa pa PDA sigui cu su trabou y tambe pa amplia su
netwerk.
Bo kier yuda of keda al tanto? Miembrecia ta gratis y habri pa tur hende.
Tanto pashentnan como profesionalnan y tur persona interesa den
mehoracion di cuido di salud por bira miembro.
E bos di cada pashent ta conta. Hunto nos por transforma experiencia
den comprension y mehoracion di nos cuido.
Pabien Aruba! Pa mas informacion of pa bira miembro di PDA, bishita
pashent.org.