For di Klas pa The Pavilion: Participacion di Studiante den Autentico Culinary Festival

For di Klas pa The Pavilion: Participacion di Studiante den Autentico Culinary Festival
Autentico Culinary Festival a sirbi como un plataforma valioso unda studiantenan por a siña y participa den
e festival “The Pavilion”. Aruba Tourism Authority (A.T.A.) a mira e balor di inclui studiantenan den e
evento, pa duna nan oportunidad pa siña den un manera practico y desaroya mas habilidadnan relaciona
cu hospitalidad y cushina.
Durante e dos dianan di evento, mas cu 60 studiante y 3 docente di Colegio EPI a participa activamente
den varios rol. Studiantenan di e programa Hospitality Management di Colegio EPI, specificamente esnan
cu ta tumando e vak Event Management, tabatin un rol importante den e evento. Nan a yuda eleva e
experiencia di bishitantenan por medio di contesta pregunta y yuda dirigi bishitantenan. Varios studiante a
yuda maneha e desk di hospitalidad y a sostene diferente vendors, klasnan di cushinamento y mixologia.
E studiantenan tambe a yuda cu coleccion di data, asistiendo bishitantenan cu a yena e encuesta na e
evento.
Adicionalmente, studiantenan di Culinary Arts tambe a traha hunto cu chef local y internacional durante e
klasnan di cushinamento, ganando experiencia practico. Mester menciona cu nan participacion a contribui
directamente na nan punto academico.

Scolnan di EPB tambe tabatin su luga den Autentico Culinary Festival. E di dos edicion, pa prome biaha, a
invita scolnan pa participa como vendor durante The Pavilion. EPB Oranjestad y EPB San Nicolas a tuma
parti di e festival e aña aki cu nan propio booths. Bou di guia di nan maestro, studiantenan a prepara tur
cuminda pa ser bendi na nan booth ambos anochi. E experiencia a duna e studiantenan oportunidad pa
siña con pa planifica, prepara y presenta un producto gastronomico na un evento.

E contribucion y dedicacion di tur studiante tabata esencial pa e exito di e evento. E iniciativa y
colaboracion cu scolnan ta pone enfasis riba e compromiso di A.T.A. pa sostene desaroyo di futuro
profesionalnan den e sector culinario y di hospitalidad, reforsando A.T.A. su strategia pa stimula talento y
habilidadnan practico pa eleva e industria vibrante di turismo na Aruba.

Aruba Tourism Authority ta gradici tur studiante, docente y scol pa nan participacion cu a contribui na e
exito di Autentico Culinary Festival.