Aruba Tourism Authority a ricibi premio Aquila Whalesong Destination durante Seatrade Cruise

Aruba Tourism Authority a ricibi premio Aquila Whalesong Destination durante Seatrade Cruise

Global

E premio ta representa forsa, sabiduria y harmonia cu ta alinia cu vision di Aruba

Diamars 14 di april, Aruba Tourism Authority (A.T.A.) a wordo honra cu e Aquila Whalesong Destination
Award, presenta door di e Aquila Center for Cruise Excellence durante Seatrade Cruise Global na Miami.
E premio ta reconoce e compromiso sobresaliente di Aruba pa excelencia den desempeño como
destinacion crucero, sostenibilidad y inversion a largo plaso den recurso humano.
E premio Whalesong ta representa door di e rabo di bayena cu ta simbolisa forsa, sabiduria y harmonia,
balornan cu ta alinea fuertemente cu e vision di Aruba pa un turismo sostenibel. E reconocemento aki ta
resalta e esfuersonan continuo di nos isla pa construi un industria di turismo resiliente cu ta pone enfasis
riba proteccion di medio ambiente, bienestar di comunidad y experiencia di bishitante dicalidad halto.
Ademas, e Whalesong Destination Award ta wordo otorga anualmente y ta celebra organisacionnan cu ta
mustra un dedicacion consistente na fortalece e experiencia di e bishitante a traves di entrenamento,
colaboracion, iniciativanan di sostenibilidad y involucracion di comunidad. Aruba awor ta uni su mes na un
grupo distingui di ganadonan anterior, incluyendo ProColombia, cu a recibi e premio na 2025.
“E Aquila Whalesong Award ta representa nos aprecio profundo pa organisacionnan cu ta inverti no
solamente den infrastructura of mercadeo, pero tambe den e recurso humano tras di turismo,” asina Beth
Hatt, Fundadora di Aquila Center for Cruise Excellence, a expresa. “Aruba Tourism Authority ta ehempel di
e compromiso aki a traves di su enfoke a largo plaso riba desaroyo di hende, sostenibilidad y colaboracion
den e sector di turismo.”
Durante casi un decada di colaboracion cu Aquila, Aruba a inverti consistentemente den un rango amplio
di programanan di entrenamento diseña pa eleva e experiencia di crucero y turismo. E iniciativanan aki a
inclui entrenamento den excelencia di servicio pa personalden ‘frontline’, programanan di conscientisacion
di destinacion, practicanan di turismo sostenibel y tayernan di fortalecemento di capacidad pa
stakeholdernan di turismo riba henter e isla.
E enfoke continuo riba entrenamento y desaroyo a fortalece e forsa laboral di turismo di Aruba, a mehora
satisfaccion di bishitante y a reafirma e compromiso di nos isla cu un crecemento di turismo responsabel y
sostenibel. A traves di colaboracion estrecho cu comunidadnan local y partnernan di industria, Aruba ta
sigui sigura cu turismo ta entrega beneficio a largo plaso tanto pa residente y pa bishitante.
E ceremonia di entrega di premio a wordo atendi door lidernan clave di industria, incluyendo Adam
Ceserano (Presidente di Florida-Caribbean Cruise Association – FCCA), Michele Paige (CEO di FCCA),
Beth Hatt, Melanie Colpitts, Ambra Attus y Danielle Timmons di Aquila Cruise Center for Excellence,
Minister di Turismo, Transporte y Labor, mr. Wendrick Cicilia, Philippe LaReine (Chief of Staff Ministerio),
Ronella Croes (CEO di A.T.A.), Patrick Melchiors (Destination Services Manager di A.T.A.), Monica Bos

(Cruise Manager di A.T.A.) y demas representante di A.T.A., Marc Figaroa (CEO di APA N.V.), Mario
Arends (Commercial Manager di APA N.V.) y demas representantenan di APA N.V.
Minister Cicilia a expresa gratitud y a subraya e compromiso cu esaki ta mustra cu nos socionan local y
internacional den e mundo di turismo, den e caso aki cu entre otro Aquila Center for Cruise Excellence &
Florida-Caribbean Cruise Association. El a garantisa cu esfuerso lo sigui ta enfoca riba excelencia y riba
eleva e experiencia pa tur cu ta dicidi di bishita.
Ronella Croes a acepta e premio den nomber di A.T.A. expresando: “Nos ta profundamente honra di por a
ricibi e Aquila Whalesong Destination Award. E reconocemento aki ta refleha e dedicacion di henter nos
sector di turismo y nos compromiso comparti cu excelencia, sostenibilidad y desaroyo continuo. Invirtiendo
den nos hendenan a traves di entrenamento y colaboracion, nos ta garantisa cu Aruba lo sigui ta un
destinacion caluroso, hospitalario y responsabel pa tur hende cu ta bishita.”
Tocante Aquila Center for Cruise Excellence
Cu mas di 40 aña di experiencia, Aquila Center for Cruise Excellence ta un lider global di confiansa den
entrenamento di turismo y desaroyo di destinacion. Como e partner exclusivo di entrenamento di Florida-
Caribbean Cruise Association (FCCA), Aquila ta ofrece programanan adapta pa destinacionnan,
operadornan di tour y profesionalnan den ‘frontline’ mundialmente, cu enfoke riba turismo (sostenibel) y
excelencia den servicio.