A.T.A. ta presenta resultado di october Por nota aumento di 5% bou di bishitantenan afluente for di Merca
A.T.A. ta presenta resultado di october
Por nota aumento di 5% bou di bishitantenan afluente for di Merca
Rapport di estadistica mensual ta inclui un splicacion di resultadonan di atraccion di bishitante afluente for di Merca. E rapport ta mustra cu Aruba ta sigui atrae turista di calidad halto, cu un aumento notabel den bishitantenan cu ingreso halto, den ingles conoci como “affluent traveler”, for di Merca. Un bishitante afluente tin tendencia di gasta mas durante nan estadia y ta evalua su experiencia positivamente. Aruba ta score un 9.2 pa e Guest Experience Index for di bishitantenan.
Segun e dato te cu augustus e aña aki, e porcion di turista for di Estados Unidos cu ingreso anual mas halto cu $150,000 a crece cu 5% compara cu 2024, mientras cu esnan cu ingreso entre $100,000 y $150,000 a crece cu 2%. E grupo aki ta representa e mayoria di e mercado Mericano y ta indica un preferencia creciente pa experiencia di mas calidad.
ESTADISTICA CONFORME ACTUALISACION DEN E INDUSTRIA DI TURISMO:
CRECEMENTO DI 5.7% DEN STAYOVER PA OCTOBER 2025 COMPARA CU OCTOBER 2024
Durante october 2025, Aruba a ricibi un total di 109,990 turista stay-over, representando un crecemento di 5.7% compara cu october 2024. Esaki ta un aumento absoluto di 5,953 bishitante. E aumento mas notabel a bini for di e mercado Norte Americano, cu 80,224 bishitante, sigui pa Latino America cu 19,665, un aumento di 6.2% compara cu 2024. For di Europa, Aruba a ricibi 6,383 bishitante, y for di otro region 3,718.
MERCADONAN Y PARTICIPACION DI E MERCADO
Pa october 2025, e distribucion di mercado ta lo siguiente: Norte America (72.9%), Latino America (17.9%), Europa (5.8%), y otro region (3.4%). E crecemento sobresaliente for di Norte America ta refleha un aumento continuo den demanda pa Aruba como destinacion tropical. Pa Latino America, Argentina y Brasil ta sigui presenta un rendimento fuerte y ta keda como un di e motornan principal tras di e crecemento den yegadanan pa e luna di october. Europa a mantene un nivel stabiel sin variacion significativo.
SHORT-TERM VACATION RENTALS (STVR)
A.T.A. ta sigui utiliza e plataforma Lighthouse pa monitorea y analiza e sector di STVR. Si compara october 2025 cu october 2024, e nivel di ocupacion promedio a subi pa 53%. E ADR (Average Daily Rate) pa october 2025 ta USD $288, mientras cu ingreso total YTD te cu october 2025 ta USD $23.4 miyon, compara cu USD $17.5 miyon na october 2024.
Short-term Vacation Rentals
2020 2021 2022 2023 2024 2025
Occupancy 32% 45% 31% 36% 48% 53%
ADR 280 291 293 352 343 288
Revenue in $ 4,602,565 8,308,409 9,885,506 16,387,347 17,513,326 23,447,636
Bishita www.ata.aw tur luna pa A.T.A. ‘Statistical Monthly Report’.
