CORONA DI MISS TURISMO WORLD A BAY PA KAYLA VILLASMIL DI ARUBA
CORONA DI MISS TURISMO WORLD A BAY PA KAYLA VILLASMIL DI ARUBA
Miss Turismo Aruba, Kayla Villasmil, a wordo corona Miss Turismo World durante di un certamen cu a conta cu presencia di varios pais den hemisferio Americano y continente Europeo.
Srta. Villasmil, un studiante di historia na Hulanda y ex-atleta di ‘Rhythmic Gymnastics’, a keda corona cu e titulo maximo sigui pa miss El Salvador como prome finalista. Kayla Villasmil a haya corona for di Miss Turismo World saliente Carolin Espinosa di Republica Domincana.
E certamen tabata inclui un siman largo di eventonan, incluyendo entrevistanan cu huradonan, forum, preliminario di entre otro trahe cultural, carnavalesco y di gala. E anochi final a tuma luga na Cas di Cultura caminda candidatanan participando den 5 categoria, Petite Teen, Teen, Petite Miss, Mrs. Turismo y Miss Turismo, procedente di paisnan incluyendo Spaña, Paraguay, Mexico, El Salvador, Republica Dominicana, Merca y Aruba.
Aruba a logra otro titulo den nomber di Briannah Arrindel, cu a sali Miss Teen Turismo. Republica Dominicana a logra gana e titulo di categoria Petite Teen. Spaña a conkista e titulo di Petite Miss y Mrs. Turismo tabata pa e candidata di Paraguay.
Den un sala di Cas di Cultura totalmente yen, anima y cu hopi sostenedor, e evento a tuma luga segun plan y cu hopi profesionalismo di parti di e organisadornan.
