Buddylove Ta Sigui Forma Parti di e Front di Buleria

Rumornan cu e cantante y e banda a split no ta cuadra cu realidad.

Pa algun dia caba, informacion eroneo tawata circula cu Jair “Buddylove” Versprey ta ‘perdi’ y cu maneho di Buleria no por establese contacto cu n’e di niun forma, y cu finalmente a dicidi di saca e cantante for di banda.

Mientras cu ta berdad cu no por a drenta den contacto cu n’e pa por dialoga riba locual ta pasando cu n’e emocionalmente, absolutamente no ta berdad cu maneho di Buleria a jega na e desicion pa termina e relacion profecional cu Buddy.

Maneho di Buleria a demostra compacion y comprencion pa su situacion personal semper, pero despues di algun siman di ausencia na varios ensayo y presentacion, e situacion a bira aun mas preocupante.

Den e ultimo dianan, maneho a logra comunica cu Buddy y a reuni ecstensamente cu n’e. Maneho di Buleria y Buddy a yega na cierto acuerdo y e relacion profecional ta continua. Buleria ta celebrando su di 10 aniversario e aña aki y ta anticipa un temporada exitante cu diferente presentacion y celebracion y ta conta cu e talento vibrante di Buddy cu mundo di farandula a custumbra cu n’e.

Di parti maneho di Buleria, nos ta extende palabranan di gratitut na fanaticonan i sostenedornan pa e forma con a biba cu tanto Buddy y e banda completo durante e periodo delicado aki.