Keighley a competi pa e titulo di Miss Eco Aruba 2020 na Amsterdam y unda final di anochi a logra gana e titulo maximo. Dia 23 Maart 2020 Keighley (22) lo ta viahando pa Egypto pa forma parti na un di e certamenan di beyeza mas grandi MISS ECO INTERNATIONAL 2020. Mas di 70 pais lo ta compitiendo pa e titulo maximo. Anochi final lo tuma lugar dia 10 di April 2020 na Cairo, Egypto. Keighley ta cai bou di e organisacion Vicky-Foundation. E fundacion ta un plataforma pa modelonan di Aruba, Curacao y Hulanda. Bou encargo di Sra. Vicky Zimmerman, modelonan ta forma parti di diferente trainingnan e.o. public speaking, pasarela, media training y prueba di talento y hopi mas. Keighley ta studiando pa Juffrouw di Aardrijkskunde na Hogeschool van Rotterdam. Dentro di 2 aña lo termina su estudio unda e lo regresa Aruba unda lo duna les na onderbouw. Keighley no ta desconoci den mundo di beyeza na Aruba. Na 2015 tabata Aruba Youth Queen 1st Runner Up, na 2016 a gana titulo di Damita Cultural. Na 2018 a concursa pa Miss Youth Aruba y a logra 1st Runner Up y mesun aña a biaha pa nos hermana Isla Curacao y a representa Aruba na Miss Teen International H2O y a kai den top 6. Keda pendiente di e damita aki, paso nos lo scucha hopi mas di dje. Hopi exito Keighley, awo bo nomber ta ARUBA.
