A.T.A. y Aruba Excellence Foundation ta sigui fortalece excelencia den servicio

A.T.A. y Aruba Excellence Foundation ta sigui fortalece excelencia den servicio
A firma di cuatro acuerdo garantisando continuacion di e Aruba Certification Program
Dialuna 28 di september 2026, Aruba Tourism Authority (A.T.A.) y Aruba Excellence Foundation (AEF) a
firma un acuerdo nobo cu lo fortalece e colaboracion strategico entre ambos organisacionnan pa sostene
y amplia iniciativanan educativo enfoca riba calidad di servicio y experiencia di bishitante na Aruba. E
acuerdo a wordo firma pa Ronella Croes, CEO di A.T.A., y Monica Bos, presidente di e Hunta di
Supervision di AEF. E acuerdo ta provee financiamento pa sostene e desaroyo y ehecucion di Aruba
Certification Program (ACP) y otro actividadnan educativo relaciona cu e mision di AEF.
Tocante Aruba Excellence Foundation
Aruba Excellence Foundation ta e entidad independiente encarga cu e maneho y evolucion continuo di
Aruba Certification Program for di 2018. E fundacion tin como mision principal pa promove excelencia den
servicio y experencia di bishitante pa medio di programanan educativo enfoca riba hospitalidad. E
organisacion ta traha hunto cu partnernan den industria turistico, educacion y Gobierno di Aruba pa
impulsa calidad y conocemento den nos comunidad.
Tocante Aruba Certification Program
Como parti importante di e acuerdo, un version renoba di Aruba Certification Program lo wordo introduci
durante 2026. Aruba Certification Program (ACP) ta un programa educativo crea pa fortalece e
conocemento y habilidadnan di profesionalnan den nos sector turistico. E curso ta cubri temanan manera
cultura, historia, naturalesa y hospitalidad Rubiano, cu meta pa mehora e experiencia di bishitante. Desde
2011, e programa a contribui di manera importante na promocion di excelencia den servicio na Aruba
E programa di ACP actualisa lo inclui contenido nobo, metodonan di siñamento modernisa y mas
oportunidad pa participante sigui entrenamento tanto den persona como digital. Ademas, e renobacion ta
enfoca riba e necesidadnan actual di e industria y ta busca pa mantene e relevancia y impacto nacional di
e certificacion.
“Nos ta hopi contento di por sigui e colaboracion valioso aki cu Aruba Excellence Foundation,” a declara
Ronella Croes, CEO di A.T.A. “Tur cu ta traha den nos sector turistico ta embahadornan di Aruba y pa e
motibo ey ta esencial cu nan tin acceso na informacion actualisa y relevante. E programa renoba di Aruba
Certification Program lo ekipa nan cu conocemento pa nan por comparti informacion corecto y contribui na
un experiencia autentico y memorabel pa nos bishitantenan.”

“Un danki na A.T.A. cu ta sigui brinda sosten na Aruba Excellence Foundation pa inverti den conocemento
y excelencia. Cu e renobacion di Aruba Certification Program, nos ta crea mas oportunidad pa
profesionalnan sigui desaroya nan mes y fortalece e calidad di servicio cu Aruba ta conoci p’e,” a expresa
Monica Bos, presidente di e Hunta di Supervision di AEF.
A traves di e acuerdo aki, A.T.A. y AEF ta reafirma nan compromiso comparti pa inverti den conocemento,
servicio, calidad di servicio y desaroyo profesional, reconociendo cu profesionalnan y trahadonan bon
prepara ta esencial pa e exito continuo di Aruba como destinacion.