Introduccion di Seminario – Tourism World 2026

Introduccion di Seminario – Tourism World 2026
Diasabra siman pasa tabata un dia hopi especial den e preparacion di dos dama extraordinario cu lo representa
Aruba cu hopi orguyo riba escenario internacional: Shannon Vullinghs, cu lo participa pa Miss
Teen Tourism World, y Mrs. Gen Ras, cu lo participa pa Mrs. Tourism World.
Den nan caminda pa bira embahadornan di nos isla, nan tin e gran privilegio di haya un
seminario di un di e personanan cu mas a contribui na desaroyo di turismo di Aruba.
Ken mihor cu Miriam Dabian pa duna nan e seminario aki?
Miriam Dabian a dedica casi cuarenta aña di su bida profesional na Aruba Tourism Authority
(ATA), unda el a hunga un papel importante den promociona Aruba den mercado di Latino
America y fortifica e posicion di nos isla como un di e destinacionnan turistico mas aprecia den
Caribe.
Cu su vision, liderato y amor pa Aruba, Miriam a yuda forma e exito cu nos industria di turismo
ta conoce awe. Su trabao a habri porta, a crea relacionnan internacional y a contribui pa pone
Aruba riba mapa mundial como One Happy Island. Aun despues di su carrera na ATA, el a
sigui comparti su experiencia y conocimiento den diferente funcionnan di liderato, conseho y
educacion.
Awe, Miriam lo comparti cu nos delegadonan hopi mas cu solamente informacion tocante
turismo. El lo inspira nan pa comprende cu un corona ta mucho mas cu un titulo; e ta un
responsabilidad. Un embahador di Tourism World ta representa e cultura, hospitalidad, valornan
y e identidad unico di su pais. Cada conversacion, cada aparicion y cada sonrisa ta un
oportunidad pa laga mundo conoce e belleza y calor humano di Aruba.
Na Shannon Vullinghs y Mrs. Gen Ras, nos ta desea cu e seminario di awe lo duna boso e
inspiracion, confianza y sabiduria pa representa Aruba cu orgullo, elegancia y autenticidad.
Recorda semper cu e mihor embahadornan ta esnan cu ta laga un impresion duradero door di
nan humildad, amabilidad, profesionalismo y amor pa nan pais.
Ban duna un caluroso bon bini na un dama cu a dedica su bida na promove Aruba y cu
hopi hende ta considera un di e pilarnan di nos industria di turismo. Un gran aplauso pa
Miriam Dabian!