SETAR a introduci su “Self Service Kiosk”

setar-dsc_0243-300x200E SETAR Self Service Kiosk ta un proyecto caminda cu SETAR conhuntamente cu Aruba Bank y un compania Canades a traha pa desaroya un Self Service Kiosk na unda e un cliente mes por acudi na e y paga su cuenta y cobranza of recarga su celular prepaid. SETAR ta gradici Aruba Bank pa a kere den e proyecto y pa a traha hunto pa por a desaroy’e. E cliente por paga cu placa cash y por usa un carchi Maestro (Debit card), pa por paga.

Segun sr. Marc Kwaad, Executive Director na Aruba Bank, encarga cu tecnologia y inovacion: “Aruba Bank ta un firme creyente cu pa medio di colaboracion y partnership metanan comun ta keda alcansa cu exito. “Nos ta hopi contento di por a duna SETAR e support den nan esfuersonan innovativo. Nos a busca y hala recursonan hunto pa trece e producto nobo aki di SETAR, e SETAR Self Service Kiosk, cual ta unico den su categoria na Aruba y Caribe, cu ta hacienda uso di Aruba Bank su EMV/Chip/magnetic stripe solution.”, asina Sr. Kwaad a expresa.

E prome 3 kiosknan ta den función caba y nan ta situa na Teleshop Irausquin Plein, Palm Beach y Seroe Blanco.
Tin plan pa den futuro bin cu mas di e kiosknan aki na otro localidadnan y pa asina facilita e clientenan di SETAR un manera hopi liher y fácil di paga nan cobransa of recarga nan celular prepaid.

Riba e potret por mira momento cu Sra. Marlushka Scheper a hiba palabra na unda e ta splica dicon e kiosk aki ta bai yuda clientenan haci nan pago rápido y fácil.
Srta. Larisa Bermudez, di Telenoticia di Telearuba a efectua e prome pago na e Self Service Kiosk como e prome cliente.