SARAH-QUITQ OFFRINGA VICTORIOSO NA SUR KOREA

SARAH-QUITQ OFFRINGA VICTORIOSO NA SUR KOREA Oranjestad -. Sarah-Quita ta embarca ariba un viahe largo di no menos cu 24 ora di vuelo pa yega Sur Korea via Amsterdam, Istanbul, Seoul, Busan, Ulsan  y finalmente  ta yega Jinha Beach den parti sur di Sur Korea.

Na Sur Korea ta unda e promer competencia pa e temporada di windsurf ta inicia y ta dura di 2-8 di mei.

Ya durante 5 dia biento ta hopi debil cu ta causa cu e competencia ta pará.

Diasabra anochi  sin embargo Sarah-Quita ta ser spierta pa su ruman desde Aruba cu ta informele cu biento ta bai supla ariba e penultimo dia cu ta diadomingo. Mirando cu tin un diferencia di 13 ora cu Aruba via windguru  ta check si tin biento pa diadomingo, mientras cu Sarah-Quita ta drumi. Grandi tawata SQ su sorpresa cu e noticia cu biento a lanta y e competencia posiblemente por tuma lugar.

Sarah-Quita ta delibera via facetime cu Quincy relaciona cu e equipo mas favorabel pa usa durante su manga.

E area di Jinha Beach tin su retonan di biento, ola, wier y desperdicio cu ta drief den e awa.

Sarah-Quita ta pasa di e eliminacion clasificatorio pa e promer eliminacion final. Mirando cu den curso di e anjanan e regatistanan femenino a mehora enormemente , Sarah-Quita ta conciente cu tur cos ta depende di un salida kerpi.

Exactamente su timing na perfeccion ta hasi cu e ta crusa e linja como promer y su contrincante Lena Erdil ta pega manera un cleconchi riba dje. Sinembargo SQ ta yega promer na e boei  y ta logra lora y sali  y gara biento limpi. E ta  accelera , crea suficiente distancia pa sigui maniobra rond otro boeinan y canta victoria. Asina e penultimo dia di competencia di windsurf ta trece victoria pa Aruba na Sur Korea. Su paisano Ethan Westera cu ta campeon hubenil di slalom tambe a hasi un bon papel. Visiblemente Ethan tin hopi velocidad y ta bira dolor di cabez pa hopi di e grandinan. E siguiente competencia ta tuma lugar na Yokosuka Japon dia 11-16 di mei venidero. Ban apoya nos regatistanan arubiano den nan afan pa demonstra cu “Aruba tin aden”.