Miss Kòrsou 2016 Biografia kandidata #5 Nashaira Balentien

swimsuit-nashairahttps://www.facebook.com/NashairaBalentien/ Final di e sertámen Miss Kòrsou 2016 ta aserkando! Si, djadumingu 2 di òktober Miss Kòrsou 2016 lo keda elegí. Coridja Stars Productions a sa di eduká, train i duna kada un di e 7 kandidatanan den 3 luna di tempu tur loke ta nesesario pa ta un embahadora digno di nos dushi país Kòrsou. Pa pueblo di Kòrsou por kaba di skohe nan faborito, Coridja Stars Productions ta duna boso e chèns pa konosénan mas di aserka i awe ta toka turno na kandidata number 5.

Nòmber: Nashaira Balentien
Edat: 19
Signo: Virgo
Estatura: 1.78
Midinan: 90-63- 94
Okupashon: Entrepeneur Lona Entertainment
Idioma ku por dominá: Spaño, Papiamentu, Ingles, i Hulandes
Koló preferí: no tin
Kuminda favorito: Pasta Alfredo
Pelíkula favorito: Dear John

Nashaira Belisa Balentien a nase riba 12 di sèptèmber di aña 1997. Su mama ta Colombiana i su tata yu di Kòrsou. E tin dos ruman hòmber, unu di 16 i unu di 33 dus semper e tabata e prinsesa na kas . E ta identifiká su mes komo un dama hopi alegre, positivo, determiná, humilde , gusta ta aktivo i ta kla pa duna un man te kaminda e por. Tambe e ta stima papia. Un di e kosnan ku mas e gusta ta keshi pero esei no ta un sekreto mas.

Na e edat di 4 aña Nashaira a kuminsá modelá i a keda riba e kaminda aki. Semper e la partisipá den aktividatnan positivo por ehèmpel: padvinderij, lès di kanta, lès di piano, volleyball, aktuashon, les di baile, landamentu i lès di pinta! Na e edat di 8 aña e la partisipá den su promé sertámen kual tabata Prinsesita Mariepampoen despues a sigui Preteen Beauty, Miss Curaçao Teenager, Teen Princess of the World i awor Miss Curaçao. Tambe e la yega di host un programa di TV ku tabatin e nòmber di TOP 20.

Nashaira a kuminsá hasi trabou boluntario na e edat di 15 aña ku su propio grupo ‘Beautiful Helping Hands’. Esaki ta yen’é ku un satisfakshon enorme te dia di awe i tin planes grandi pa ku esaki den un futuro hopi serkano. Aktualmente Nashaira a finalisá su estudio sekundario na kolegio alejandro paula i tin planiá kuminsá otro aña ku su estudio di leinan internashonal i europeo na Den Haag. Ku e estudio aki e por haña e oportunidat pa traha ku organisashonan grandi tal komo Nashonan Uni, Rode Kruis etc. Nashaira ke logra hopi kos ku Beautiful Helping Hands dor di hasi esaki un fundashon legítimo i logra duna un man tantu na mucha komo na adultonan nashonal i internashonalmente.

Aktualmente e sertámen di Miss Kòrsou ta Nashaira su prioridat te na momento ku e kuminsá atrobe ku su estudio. E ta uza e periodo aki pa krese mas komo persona i siña konose su mes mas mihó promé e kuminsá ku su próksimo reto ku ta su estudio.

Share
%d bloggers like this: