Love Festival 2017 ta introduci su ‘Caribbean Area’

Pensando pa proyecta Aruba di un forma mas amplio y na mesun momento complace mas gusto, Love Festival ta crece. Diabierna atardi organisadornan hunto cu Aruba Tourism Authority y patrocinadornan a ofrece un conferencia di prensa pa anuncia detayenan di Love Festival 2017. Den su di cuater edicion, Love Festival ta crece atrobe y ta comberti den un festival di bon musica, bon energia y bon experiencianan durante un total di cinco dia den luna di november proximo.
For di inicio, e plan maestro di Love Festival tabata pa den termino di cinco aña ubica e evento na un escala y plataforma internacional; y ta logrando esey tambe. Love Festival ta keda adapta su concepto pa asina participantenan biba e experiencia musical, pero tambe conoce nos isla y su atractivonan natural y cultural. Pa e motibo ey, for di aña pasa, Love Festival ta pone celebracion di Carnaval den enfoke principal, y e aña aki ta bay na e siguiente nivel.
Aruba Tourism Authority ta comparti e obhetivo di e organisadornan y pesey for di aña pasa a uni forsa pa realisa e esfuersonan cu ta atrae un mercado nobo y cu gran poder di compra pa nos isla. E ekipo di Love Festival di su banda, ta percura pa cumpli cu tur expectativa pa loke ta trata organisacion, ehecucion y resultado. Ta esencial, y a demostra esaki den pasado, cu ta tene debido cuenta cu seguridad y limpiesa, entre otro aspectonan. E aña aki no lo ta diferencia tampoco. Mester bisa danki tambe na nos publico ya cu semper tabatin un comportacion ehemplar.
Pa 2017, Love Festival ta introduci su ‘Caribbean Area’, adicional na e stage di ‘Love’ y ‘Tech’. Den e Caribbean Area, Love Festival ta bay presenta un repertorio di DJ y agrupacionnan local pa duna e festival un toke mas crioyo y complace asina nos smaak diverso den generonan musical. Nos talentonan loal tin e oportunidad di hala atencion di ehecutivonan musical di exterior cu semper ta presente. Den e mesun espacio aki tambe Love Festival ta busca pa traha cu gruponan di Carnaval cu por exhibi nan tema pa 2018 y tambe registra participantenan. Tambe lo tin un Entertainment Zone y un Food Village pa completa e experiencia.
Love Festival 2017 lo tuma luga entre diaranson 1 pa diadomingo 5 di november proximo na un locacion cu pronto lo keda anuncia. Adicional na e anochinan di festival, tin varios pool party y otro actividadnan destina pa mustra nos isla na e bishitantenan. Entradanan ya ta obtenibel y ta conseha un y tur pa probecha pa e ofertanan cu tin pa esnan cu cumpra trempan. Disfruta di mas di 19 DJ internacional, 10 DJ local y 6 banda musical. Love Festival ta keda encurasha su dress code blanco, pero expresando bo individualidad cu un toke Carnavalesco.
Pa mas informacion di Love Festival 2017 y e sorpresanan cu tin na caminda, nos ta invita pa keda pendiente di nos website: www.lovefestivalaruba.com y tambe e cuentanan di Facebook, Twitter y Instagram.