KIWANIS CLUB OF ARUBA A HACI DONACION DI AWG 40,000.00 NA DIFERENTE FUNDACION DEN NOS COMUNIDAD

KIWANIS CLUB OF ARUBA A HACI DONACION DI AWG 40,000.00 NA DIFERENTE FUNDACION DEN NOS COMUNIDAD

 

Oranjestad−  Recientemente Kiwanis Club of Aruba a haci algun donacion na varios fundacion, cu ta eherce diferente trabou beneficioso den nos comunidad. Awendia no ta facil pa mantene un fundacion riba pia y ta exigi hopi tempo, esfuerso y dedicacion pa por logra e metanan. P’esey mes Kiwanis Club of Aruba ta haya sumamente importante pa aprecia y duna sosten na e fundacionnan aki, p’asina nan sigui eherce e trabou debidamente, cu na final ta na bienestar di nos propio muchanan.

Kiwanis Club of Aruba ta aporta y colabora  pa mas di 30 aña cu e chikito y hobennan di San Nicolas mediante “Aruba South Little League” door di sponsor e team di baseball. E club a wordo reconoci pa nan aporte continuo brinda na dicho organisacion. E campeonato e aña aki a wordo dedica na Kiwanis Club of Aruba, cu tin mas di 30 aña colaborando cu Aruba South League. Kiwanis Club of Aruba ta sintie honra cu e reconocimento aki na mesun momento presidente di Kiwanis Club of Aruba, Sra. Aurora Dijkhoff, a haci entrega di un check na e presidente di “Aruba South Little League” Sr. Serio Rombley.

Otro fundacion cu e miembronan di Kiwanis Club of Aruba a haci un bishita, tabata na Fundacion Paso pa Paso Aruba. Durante e bishita ameno aki e miembronan presente a ricibi informacion extenso di e diferente proyecto- y servicionan cu e Fundacion ta haci pa e comunidad di Aruba.  Kiwanis Club of Aruba kier duna su aporte tambe, pa asina yuda Fundacion Paso pa Paso continua cu su tremendo trabou, cu nan ta haciendo pa e comunidad di Aruba. Presidente di Kiwanis Club of Aruba, Sra Aurora Dijkhoff, a gradici y elogia Fundacion Paso Pa Paso Aruba pa nan aporte brinda na e comunidad di Aruba y a entrega un check na Sr. Carlos Falla. E donacion lo sirbi como un contribucion importante na proyecto, pa asina adkiri y renoba material didactico, cu e Fundacion Paso pa Paso su team profesional ta uza.

“E material aki lo yuda pa sigui duna un bon servicio na e clientenan y tambe lo beneficia e clientenan di otro instancia y organisacion cu ta haci uzo di nos servicio”.  Sr. Carlos Falla a gradici Kiwanis Club of Aruba pa e tremendo sosten y confianza aki.

Recientemente Kiwanis Club of Aruba a haci entrega di otro check, balora na Awg. 30,000 na Presidente di  Fundacion “Ban Uni Man pa Cria nos muchanan” di Sr John Fun. E fundacion aki ta percura, pa e muchanan di poco recurso, haya algo di come tur mainta na scol mes y asina aporta na nan prestacion na scol, ya cu desayuno ta keda un alimento di sumo importancia.

 

 

Kiwanis Club of Aruba a haci entrega tambe di un check na balor di AWG 3020,- na baby Zia,  contribuyendo asina pa baby Zia haya su “Zippie Voyage Stroller”.

Por ulitmo Kiwanis Club of Aruba a haci donacion di Awg. 2000,- na Fundacion Autismo Aruba, pa nan workshop “Autismo den Klas”, unda ta educa e maestronan y otro educador, tocante con pa anda miho cu e muchanan cu autismo den klas.

 

Kiwanis ta un organisacion global di boluntario dedica na mehora mundo via un mucha y via di un comunidad cada biaha y tin como lema: sirbiendo e muchanan di mundo. Kiwanis Club of Aruba ta activo den e comunidad Arubano desde 1965. Pa mas informacion di Kiwanis Club of Aruba y of su actividadnan por acudi na www.kiwansaruba.org of Facebook page Kiwanis Club of Aruba.  Tambe por bishita e website di Kiwanis Internacional na www.kiwanis.org.