Federacionnan deportivo cla pa manda nan nominadonan Ken lo bira Aruba su Atletanan di Aña 2016?

Federacionnan deportivo cla pa manda nan nominadonan Ken lo bira Aruba su Atletanan di Aña 2016?

Aruba, 10 di februari 2017. Pa 14 aña consecutivo un comision consistiendo di representantenan di e organonan deportivo manera Aruba Sport Unie, IBISA, Ministerio di Deporte hunto cu e reportero y/of redactornan deportivo di prensa, radio y television, den un forma organisa y imparcial ta studia y repasa e curiculo di tur e nominadonan, pa na final scoge e deportista di aña y reconoce e figura deportivo pa su prestacion.
Durante di un anochi di gala lo haci entrega di e maximo galardon na e atleta cu a destaca den e aña deportivo 2016. E evento di galardon, Premio Excelencia den Deporte ta e unico evento cu ta reconoce e trabou duro hiba pa nos miho deportista y dirigentenan den tur edad durante e anja deportivo tras di lomba. For di inicio di e premiacion na aña 2003, atletanan den diferente ramo di deporte a gana e premio maximo y bira Aruba su deportista di aña. Mas cu claro esaki no a bay sin su esfuerso y sacrificio di tanto e atleta y su federacion cu e ta representa. Di e atletanan cu a yega di wordo premia den pasado algun di nan ainda ta activo na Aruba mes, mientras otronan a dicidi di bay biba den exterior y continua cu nan estudio y sigui practica nan deporte preferi. Ta bon pa bisa cu cada anja e federacionnan deportivo ta reacciona den forma positivo, mientras un gran parti for di tempran ta cuminsa traha riba nan nominadonan. Mas cu claro por miho y ta spera cu e anja ki lo haya reaccion di e mayoria federacionnan deportivo afilia.
E comision organisador ta spera cu tur federacion lo haci nan maximo esfuerso pa manda nan nominadonan pa asina e deportistanan di cada ramo di deporte no keda perhudica. E fecha y dia di e gran evento lo ta 24 di maart benidero. Ta spera cu tur federacion lo entrega e informacion di su nominado na tempo esaki mas tarda diaranzon 1 di maart pa asina na e anochi di gala e deportistanan por sinti nan mes honra di a wordo reconoci pa tur e sacrificio y esfuersonan haci den e temporada deportivo 2016 cu e la destaca den dje.