Dia 29 di september ta “Dia Mundial di Curason”

IBiSA ta informa: Dia 29 di september ta “Dia Mundial di Curason”

 

Un curason saludabel ta hopi importante. Ora bo ta cuida bo curason esey kiermen cu bo ta trata bo curason como e tesoro mas precioso cu bo tin. Bo ta come y bebe saludabel, haci actividad fisico, stop di huma y hiba un bida trankil. Tur cos cu ta haci bo no solamente mas saludabel sino tambe laga bo sinti bon y goza di bida sanamente.

 

‘World Heart Day’ ta wordo celebra tur aña riba dia 29 di september. Tabata na mei 2012 cu lidernan mundial a cera acuerdo pa reduci e mortalidad di malesanan cardiovascular cu 25% na aña 2015. Malesanan cardiovascular ta e causante di morto number 1 na mundo. Aruba no ta un excepcion. E atencion di e ‘Dia Mundial di Curason’ e aña aki ta concentra riba comparti e informacion di con pa hiba un bida mas saludabel na beneficio di nos curazon. E tema e aña aki ta: “Comparti e poder”. E tema aki tin como meta pa encurasha nos tur pa siña con pa reduci e riesgonan pa haya enfermedad cardiovascular y comparti esaki cu bo famia, conocirnan y Aruba henter.

 

Un tercera parti di e cifranan di morto registra anualmente na Aruba ta pa cuasa di enfermedadnan di curason y ader. E bon noticia ta cu haciendo cambio na nos estilo di bida nos por baha e riesgo pa por haya e malesa(nan) aki. Algun di e cambionan aki ta e.o.: haci actividad fisico, come mas saludabel, stop di huma, mantene un peso saludabel, haci bo chekeo di salud regularmente.

 

IBiSA conhuntamente cu Plataforma Promocion di Salud y Aruba Heart Foundation ta conscientisa comunidad di Aruba, tanto hoben como adulto pa busca informacion riba e cuido di bo curason y compromente bo mes pa haci e cambionan necesario y comparti esaki cu bo famia, conocirnan y coleganan.