Caluroso bon bini pa Team Aruba

Caluroso bon bini pa Team Aruba

 

Despues di un tremendo actuacion den e Weganan Suramericano Hubenil Santiago 2017 na Chile, dialuna merdia nos atletanan hubenil a regresa for di e weganan. Mester bisa cu e delegacion a wordo bon ricibi na airport pa mayor, famia, amigo y conocirnan sin lubida miembronan di Comite Olimpico Arubano, Minister di Deporte, dr. Schwengle y Prensa.

 

E muchanan a haya un caluroso bon bini cu hopi grito y aplauso. Nos por a hasta mira t-shirt wordo traha pa ricibi e medayistanan ruman Chiara y Sophia Petrocchi. Palabra di elogio so por a scucha di esnan presente, tur a biba e bunita momentonan cu henter e delegacion. Manera Sra.Nicole Hoevertsz a bisa den su speech; “Boso a hasi nos hopi orguyoso mes cu boso prestacion na Chile. Esaki ta djis e comienso di hopi mas cu falta pa bini. Awo Aruba sa kendenan ta e futuro generacion den deporte Olimpico”.

 

Mas cu claro tabata tin momentonan hopi emocional ora e atletanan topa cu nan mayornan y famianan. Un lagrima di alegria no tabata falta, con cu bay bini, e contribucion di cada mayor y familiar ta exito di cada atleta. Sin dedicacion di e mayor e mucha no por logra di ta exitoso.

 

Pabien Team Aruba. Nos a pone otro stempel den exterior.