Brazil Taekwondo Stichting a sali best team na e di 9 campeonato nacional na memoria di srta. Anashia Murray q.e.p.d.
Manera a anticipa cu e team di Train Hard Fight Smart lo bay cu e copa di Best Team, pero a empata cu San Nicolas Taekwondo Center cu 6 pelea gana y 1 perdi. Master Eric Barry a dicidi cu ta bay tin dos prome lugar y asina Brazil Taekwondo Stichting a sali best team hunto cu San Nicolas Taekwondo Center.
Brazil Taekwondo Stichting su team dinamico no a gana tur pelea manera cu nos a antecipa, pasobra Danon Delamore a haña un lesion na su pia den e di dos rond y e referee a para e pelea y Danon Delamore a wordo declara perdedor y asina Brazil Taekwondo Stichting a perde un di su 7 peleanan pa e best team.
San Nicolas Taekwondo Center su team tabata mesun fuerte cu esun di Brazil Taekwondo Stichting y a perde 1 pelea tambe. Esaki ta pone cu e team jong dinamico di Brazil Taekwondo Stichting tin trabou pa haci si nan kier sigui logra di gana e copa di Best Team. Awor e team ta preparando pa e biahe pa Surinam, pasobra 4 atleta di Brazil Taekwondo Stichting lo biaha pa asina Aruba ta bon representa na Surinam. Manera cu bolbe for di Surinam lo sigui cu e preparacion pa e biahe largo pa Korea. Na Korea si lo tin cu bay all out si kier gana un medaya, pasobra e Koreanonan si no ta haci wega.
Brazil Taekwondo Stichting su directiva ta contento cu e resultado di e team di Train Hard Fight Smart.