Aruba Triathlon Association lo organisa e Duathlon Nacional 2017

Cu ayudo di Lotto Aruba Triathlon Association lo organisa e Duathlon Nacional 2017

Oranjestad, Aruba – 1 di september, 2017: Diadomingo 3 di september, Aruba Triathlon Association lo organisa su Guardian Group Duathlon Nacional pa mucha, junior y adulto. Na e mainta aki por competi den e categorianan individual of den ekipo di relevo. E evento lo cuminsa na Boca Catalina pa 7:00 di mainta.
Lo recori diferente distancia esakinan pa e categoria Kids te cu 14 aña cu lo mester core un total di 2.5 km, despues lo mester core bicicleta 10 km y finalisa e competencia cu coremento na pia riba un distancia di 1.5 km.  Pa loke ta e categoria di Junior/Adulto, esakinan lo mester recori un distancia mas largo. Prome lo mester core na pia un distancia di 5km, despues subi bicicleta y recori un total di 20 km pa despues finalisa e evento cu un coremento na pia riba un distancia di 3km. Por utlimo tin Female 15+ cu lo mester core na pia un distancia di 5km, despues subi bicicleta y recori un total di 20 km pa despues finalisa e evento cu un coremento na pia riba un distancia di 3km. Na final lo reparti medaya pa e ganadornan den e diferente categorianan.
Un danki sigur na Lotto, e Loteria di Aruba pa medio di Comision di Subsidio cu a subsidia e evento di Duathlon Nacional organisa pa e federacion di triatlon, ATA.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.