Alumnonan di Tiger Taekwondo a haci entrega di un bunita plakaat na Lotto pa Deporte

Alumnonan di Tiger Taekwondo a haci entrega di un bunita plakaat na Lotto pa Deporte

 

Recientemente e conocido scol di taekwondo na Aruba esta Tiger Taekwondo a bishita St. Fundacion Lotto pa Deporte y su presidente sr. Di Stefano Wernet RA. E scol di taekwondo maneha pa sr. Teofilo Rodriguez ta un di esnan mas popular na Aruba. Luna pasa e scol a celebra nan di 18 edicion di e Tiger Taekwondo Open International Championship cu a conta cu un participacion di 280 atleta di diferente pais manera Colombia, Surinam, Venezuela, Republica Dominicana, Merca, Panama, Argentina, Sur Korea, Boneiro, Corsow, Boneiro, Costa Rico y Puerto Rico. Director Teo Rodriguez ta contento cu e obhetivo aki cual ta un soño pe y su organisacion y a gradici entre otro Lotto pa Deporte cu a kere den e evento aki. Pa e motibo aki tambe sr. Rodriguez den nomber di e alumnonan y directiva completo di Tiger Taekwondo a haci entrega di un bunita plakaat na presidente di St. Fundacion Lotto pa Deporte, sr. Di Stefano Wernet RA esaki como muestra di aprecio pa nan contribucion duna na e di 18 edicion di e Tiger Taekwondo Open International Championship.

 

Actualmente Tiger Taekwondo ta opera den su localidad nobo na Centro di Bario Piedra Plat. Mester bisa cu algun atleta hopi popular a y te ainda ta entrena bou di sr. Teo Rodriguez. Asina nos por a mira e rumannan Chiara y Sophia Petrocchi, e atleta Olimpico Monica Pimentel, e atleta Panamericano John Jairo Maduro y sin lubida e prospecto Angelo Rodriguez cu ta e propio yiu di Teo Rodriguez.

 

Den nomber di di directiva Lotto pa Deporte, sr. Di Stefano Wernet RA a desea Sr. Teofilo Rodriguez y su alumnonan di Tiger Taekwondo tur clase di exito cu e deporte di taekwondo. Lotto bou liderasgo di nos Ministro di Deporte Dr. Alex Schwengle ta sigi aporta grandemente na deporte di Aruba.

 

Lotto, e Loteria Nacional di Aruba ta sigi cambia bida di nos atleta nan den tur ramo di deporte!